Testdan ozod etilgan abituriyentlarga ruxsatnoma berilmaydi

Bilim va malakalarni baholash agentligi ma'lumot berishicha, test sinovidan ozod etuvchi huquqqa ega abituriyentlar uchun alohida ruxsatnoma rasmiylashtirilmaydi. Bu qoida sertifikat asosida yoki qonunchilikda nazarda tutilgan boshqa sabab bilan ozod etilgan barcha abituriyentlarga bir xilda tatbiq etiladi.

Xususan, ro'yxatdan o'tish jarayonida "sertifikatdan foydalanaman" variantini tanlagan va barcha fanlardan milliy sertifikatga ega abituriyentlar test sinovidan avtomatik ozod hisoblanadi. Shu sababli ularning shaxsiy kabinetida ruxsatnoma umuman shakllanmaydi va test o'tkaziladigan hududga borishlari shart emas.

Agentlik ma'lumotlariga ko'ra, test sinovlari yakunlangach, mazkur toifadagi abituriyentlar ham qabulning ikkinchi bosqichida ishtirok etadi — ularga 15 kun ichida oliy ta'lim muassasasi, ta'lim yo'nalishi, ta'lim shakli va tanlov ustuvorligini belgilash imkoniyati beriladi.